काठमाडौं,११ भदौ : नेपाल कम्युनिस्ट पार्टीका महासचिव नेत्रविक्रम (विप्लव) सी ले एमसीसी केवल आर्थिक प्रोजेक्ट मात्र नभई सैन्य मोर्चा रहेको बताएका छन । सोमबार काठमाडौंमा नेकपाले आयोजना गरेको एमसीसी परियोजना कार्यान्वयन विरुद्धको बृहत अन्तरक्रिया कार्यक्रममा पार्टीका महासचिव विप्लवले यस्तो बताएका हुन् ।
उनले अमेरिकाले सहयोग या अनुदान देखाएर अमेरिकी साम्राज्यवाद नेपालमा ल्याउन खोजेको बताए । महासचिव विप्लवले भने ,“ अनुदानका लागि , केही अर्ब पैसाका लागि नेपाल आमालाई बेच्न हुँदैन । सच्चा देशभक्त नेपाली नागरिक त्यो जुनसुकै देशमा किन नबनोस वा जुनसुकै पार्टीको सदस्य किन नहोस् हरेक नागरिक सच्चा नेपाली भएर एमसीसी लाई हेर्नुपर्छ र यसको विरुद्धको लडाइँमा उभिनपर्छ ।”देशप्रति गद्धारी गर्नु नेपाल आमाप्रति गद्धारी गर्नुसरह भएको उनको भनाई छ ।
देशप्रतिको विदेशीको हमला भइरहेको बेला सम्पूर्ण वामपन्थी, प्रगतिशील , कम्युनिष्टहरू एक ठाउँमा आउनुपर्ने उनी बताउँछन ।
