काठमाडौँ। नेपाल धितोपत्र बोर्ड (सेबोन) ले कमजोर वित्तीय अवस्था भएका कम्पनीहरूलाई प्रारम्भिक सार्वजनिक निष्कासन (आईपीओ) जारी गर्न रोक लगाउने नयाँ मापदण्ड तयार पारेको छ। बोर्डले प्रस्ताव गरेको ‘सार्वजनिक निष्कासनको सामान्य योग्यता सम्बन्धी निर्देशिका’ अनुसार अब प्रतिसेयर नेटवर्थ १०० रुपैयाँभन्दा कम भएका कम्पनीहरूले सर्वसाधारणका लागि सेयर जारी गर्न पाउने छैनन्।
सेबोनका अध्यक्ष गोपाल भट्टले अघि बढाएको यो कदमले विगतमा जलविद्युत् लगायतका क्षेत्रमा देखिएका कमजोर र ऋणमा डुबेका कम्पनीहरूलाई सेयर भिराएर प्रवर्द्धकहरूले लाभ लिने विकृतिलाई अन्त्य गर्ने अपेक्षा गरिएको छ। यसअघि वर्षौंसम्म घाटामा रहेका तथा १०० रुपैयाँभन्दा कम नेटवर्थ भएका कम्पनीले समेत आईपीओ जारी गरी सर्वसाधारणको रकमबाट ऋण चुक्ता गर्ने प्रवृत्ति मौलाएको थियो।
नयाँ व्यवस्थाले साना तथा सर्वसाधारण लगानीकर्ताको पुँजीलाई उच्च जोखिमबाट जोगाउनुका साथै पुँजी बजारमा वित्तीय सुशासन र गुणस्तरीय कम्पनीहरूको मात्र प्रवेश सुनिश्चित गर्नेछ। यद्यपि जलविद्युत् प्रवर्द्धकहरूले यो व्यवस्थाप्रति असन्तुष्टि जनाए पनि बोर्डले वास्तविक खुद सम्पत्ति र पारदर्शी लेखापरीक्षण भएका कम्पनीलाई मात्र स्वीकृति दिने रणनीति अपनाएको छ।
