काठमाडौं । आइतबार साँझ काभ्रेको धुलिखेलका दुई घरमा चट्याङ पर्दा लाखौँको धनमाल क्षति भएको छ ।
धुलिखेल नगरपालिका १० सारदा बतासे निवासी लक्ष्मी केसी र सोही ठाउँका सुवर्ण केसीको घरमा चट्याङ परेको जिल्ला प्रहरी कार्यालय काभ्रेले जनाएको छ ।
चट्याङबाट लक्ष्मीको दुई तल्ले पक्की घरको छतको ढलान तीन ठाउँमा प्वाल पारेको प्रहरीले जनाएको छ । चट्याङले घरको कोठाको गारोसमेत भत्किएको छ ।
चट्याङबाट बिजुलीको मिटर बक्स, फ्रिज, सिलिङ फ्यानसहितका विद्युतीय उपकरणमा क्षति भएको प्रहरीले जनाएको छ । चट्याङले लक्ष्मीको घरमा झण्डै पाँच लाख रुपैयाँ मूल्य बराबरको क्षति भएको जिल्ला प्रहरी कार्यालय काभ्रेका डीएसपी राजकुमार श्रेष्ठले जानकारी दिए । त्यसैगरी सुबर्ण केसीको पक्की घरको छतसमेत चट्याङले प्वाल परेको छ ।
टीभी, बिजुलीको मिटरसहितका विद्युतीय उपकरण जल्दा उनको पनि झण्डै ५० हजार रुपैयाँ मूल्य बराबरको क्षति भएको श्रेष्ठले बताए । चट्याङबाट मानवीय र पशुचौपायामा भने क्षति भएको छैन ।
