२ साउन २०८१, बुधबार
२ साउन २०८१, बुधबार

नेपाली महिला फुटबल टोली वाफ महिला च्याम्पियनसिपको सेमिफाइनलमा

काठमाडौं । नेपाली महिला राष्ट्रिय फुटबल टोलीले वाफ महिला च्याम्पियनसिप २०२४ को सेमिफाइनलमा स्थान पक्का गरेको छ ।

स्टार फरवार्ड सावित्रा भण्डारी ‘साम्बा’ ले विहीबार वाफ च्याम्पियनसिप २०२४ अन्तर्गत इराकविरुद्ध पाँचौ गोल गर्दै अन्तर्राष्ट्रिय फुटबलमा ५० गोल पूरा गरिन् । नेपालले ५-० को फराकिलो जित दर्ता गर्दै सबै ५ गोल गरेकी साम्बाले दूर्लभ इतिहास आफ्नो नाम गरिन् ।

समूह चरणको दोस्रो खेलमा नेपालको जितसँगै प्यालेस्टाइनले सिरियालाई हराएपछि समूह बी बाट सेमिफाइनल जाने दुई टोलीको टुंगो लागेको हो । ८ राष्ट्र सम्मिलित प्रतियोगिताको दुवै समुहबाट शीर्ष २ टोली सेमिफाइनलमा प्रवेश गर्नेछन् ।

नेपालले पहिलो खेलमा सिरियालाई ४-१ तथा दोस्रो खेलमा इराकलाई ५-० ले हराउँदै ६ अंक जोडिसकेको छ । यस्तै प्यालेस्टाइनले पहिलो खेलमा इराकलाई ३-० तथा दोस्रो खेलमा सिरियालाई १-० ले हराएर अन्तिम चारमा स्थान पक्का गरेको हो ।

अब समूह चरण अन्तर्गत शनिबार सिरिया र इराक तथा प्यालेस्टाइन र नेपाल खेल्नेछन् । प्यालेस्टाइनले अन्तिम खेलमा नेपाललाई हराए मात्र समूह विजेता बन्नेछ । नेपाललाई भने समूह विजेता बन्न बराबरी पर्याप्त हुनेछ ।

यस्तै अर्को समूहमा ५ पटकको विजेता जोर्डन र लेबनान सेमिफाइनलमा पुगिसकेका छन् । शुक्रबार हुने लेबनान र जोर्डनको खेलले समूह विजेताको छिनोफानो हुनेछ । यस समूहबाट आयोजक साउदी अरब र ग्वाम बाहिरिसकेका छन् ।

सावित्राकाे अन्तर्राष्ट्रिय ५० गाेल

सन् २०१४ मा भुटानविरुद्ध बेन्चबाट मैदान प्रवेश गरेको केही मिनेटमै पहिलो अन्तर्राष्ट्रिय गोल गरेकी उनले दशक लामो यात्रापछि यो आँकडा भेटेकी हुन् । बिचमा गम्भीर चोटका कारण टोलीबाहिर रहेपनि उनले पुनरागमन गर्दै गोल गर्ने क्रममा ब्रेक लाग्न दिइनन् । यसबीचमा उनले आफूले खेलेको २५ खेलमा गोल गरेकी छिन् ।

सावित्राले गोल गरेको ४ खेलमा मात्र नेपालले हार बेहोरेको छ । उनले गोल गरेको १७ खेलमा नेपालले जित दर्ता गर्दा ४ खेल बराबरीमा सकिएका छन् ।

भुटानविरुद्ध पहिलो गोल गरेकी सावित्राले २०१६ को दक्षिण एसियाली खेलकुद अन्तर्गत श्रीलंकाविरुद्ध २ गोल थपिन् । एन्फा कम्प्लेक्समा भएको मलेसियाविरुद्ध मैत्रीपूर्ण खेलमा एकमात्र गोल गरेकी उनले त्यसै वर्ष साफ महिला च्याम्पियनसिपमा भने गोलवर्षा नै गरिन् ।

भुटानविरुद्ध पहिलो खेलमा ६ गोल गरेकी उनले दोस्रो खेलमा माल्दिभ्समाथि ५ गोल थापिन् । सेमिफाइनलमा नेपाल भारतसँग ३-१ ले पराजित हुँदा उनले सान्त्वना गोल फर्काएकी थिइन् ।

नेपालले मलेसियामा मैत्रीपूर्ण खेल खेल्दा सावित्राको गोलमा नेपालले १-१ को बराबरी खेल्यो । अर्को खेलमा भने नेपाल पराजित भएको थियो ।

त्यसपछि म्यानमारविरुद्ध १-१ को बराबरीमा गोल गरेकी साम्बाले भारतलाई पहिलो पटक हराउँदा दुवै गोल गरेकी थिइन् । इरानमाथि ३-० को जितमा पनि साम्बाले नै २ गोल गरिन् ।

सन् २०१९ को सागमा भुटान, बंगलादेश, श्रीलंका र भारतविरुद्ध उनले १-१ गोल थपिन् । त्यसपछि ओलम्पिक छनोटकै इन्डोनेसियामाथि २-१ को जितमा दुवै गोल साम्बाकै नाममा रह्यो ।

नेपालले पहिलो पटक नादेझ्दा कप खेल्दा साम्बाले ४ गोल गर्दै किर्गिस्तानमाथि नेपालले ८-२ को जित दर्ता गर्यो । ताजिकिस्तानविरुद्ध खेलको एकमात्र गोल गरेकी साम्बाले फाइनलमा २ गोल गरेपनि उज्बेकिस्तानविरुद्ध ३-२ को हार टार्न सकिनन् ।

सन् २०१९ मा माल्दिभ्सविरुद्ध ३ गोल गरेकी उनले त्यसपछि घुँडाको चोटका कारण मैदानबाहिर रहनुपर्यो । नेपालले विश्वकप छनोटका खेल खेल्दा सावित्रा एसीएल शल्यक्रियापछि रिह्याब गर्दै पुनरागमनको प्रतीक्षामा थिइन् ।

सन् २०२२ मा नेपालमै भएको साफ च्याम्पियनसिपमा भुटानविरुद्ध ४-० को जितमा साम्बाले २ गोल गरिन् । तर डेंगी संक्रमणका कारण उक्त प्रतियोगितामा साम्बा उपलब्ध नहुँदा टोलीले उपाधिबाट विमुख हुनुपर्यो ।

२०२३ मा बंगलादेशमा सावित्राले बराबरी भएको खेलमा गोल गर्दै पेनाल्टी सुटआउटमा जित दिलाइन् । भिएतनामविरुद्ध नेपाल ओलम्पिक प्लेअफमा ५-१ ले हारेपनि साम्बाको नाममा गोल रह्यो ।

भारतविरुद्ध मैत्रीपूर्ण खेलमा २-० ले पछि परेको स्थितिबाट साम्बाले लगातार २ गोल गर्दै नेपाललाई हारबाट जोगाइन् । त्यहाँयता उनी इजरायली क्लब हुँदै फ्रान्सको एन अभान्ट ग्वेंगाम्पमा खेलिरहेकी छिन् ।

पश्चिम एसियाली राष्ट्रले खेल्ने वाफ च्याम्पियनसिपको आमन्त्रित टोली नेपाललाई सुरुवाती दुवै खेल जिताउन साम्बाले गजबको प्रदर्शन गरिन् । पहिलो खेलमा ४-१ को जितमा १ गोल गरेकी साम्बाले दोस्रो खेलमा ५-० को जितमा सबै ५ गोल गरिन् ।

यससँगै उनले राष्ट्रिय टोलीका लागि ५० गोल पूरा गरेकी हुन् ।

यो खबर पढेर तपाईलाई कस्तो महसुस भयो ?
  • खुसी (0%)
  • दुःखी (0%)
  • अचम्मित (0%)
  • हाँस्यास्पद (0%)
  • आक्रोशित (0%)
spot_img
spot_img
spot_img
spot_img
spot_img
spot_img
प्रतिक्रिया

Array

युग प्रेस डटकम

युग प्रेस डटकममा प्रकाशित सामग्रीबारे कुनै गुनासो, सूचना तथा सुझाव भए हामीलाई yugpress9123@gmail.com मा पठाउन वा ९८४८८६७८३३ फोन गर्न सक्नुहुनेछ ।

सम्बन्धित खबर

सामाजिक संजाल

लाेकप्रिय

भर्खरै

spot_img

छुटाउनुभयो कि ?