कालीकोट । कालीकोटको नरहरिनाथ गाउँपालिकाका विद्यालयहरूमा हुने राजनीतिक गतिविधिले शिक्षाको वातावरण बिग्रिएको भन्दै स्थानीय युवा प्रशान्त बिकले स्थानीय सरकारको ध्यानाकर्षण गराएका छन्। विद्यालय ज्ञान आर्जन गर्ने स्थान भएकाले यसलाई राजनीतिक प्रभावबाट मुक्त राख्नुपर्ने उनको जोड छ।
शिक्षा ऐन र नियमावलीले विद्यालयलाई “शान्ति र राजनीति निषेधित क्षेत्र” तोकेको स्मरण गराउँदै बिकले विद्यार्थीलाई दलीय भीड र प्रदर्शनमा प्रयोग गर्न नहुने बताए। विद्यालयमा दलीय विभाजन हुँदा विद्यार्थीबीच द्वन्द्व बढ्ने, शिक्षकहरू विभाजित हुने र तालाबन्दीले पठनपाठन ठप्प हुने उनको भनाइ छ।
कलिलो उमेरमै दलगत प्रभावमा पार्नु घातक हुने उल्लेख गर्दै बिकले नेतृत्व विकासका लागि बाल क्लब, स्काउट र वादविवाद जस्ता रचनात्मक विकल्प अपनाउनुपर्ने धारणा राखेका छन् ।
