काठमाडौं – चिनियाँ सरकारको प्रत्यक्ष संलग्नतामा बन्न लागेको बेल्ट एण्ड रोड इनिसियटिभ (बिआरआई) परियोजना कार्यान्वयन नगर्न छिमेकी राष्ट्र भारतले ब्यापक दबाव दिएको पाइएको छ । कछुवा गतिमा नै भएपनि अघि बढिरहेको बिआरआईलाई रोक्न एमसीसी र अमेरिकी कुटनीतिज्ञहरुसँगै भारतले सरकारमाथि दबाव दिइरहेको नेपाल कम्युनिस्ट पार्टीले जनाएको छ ।
नेकपा उच्च श्रोेतलाई आएको जानकारी अनुसार भारतले कर्मचारीलाई काम नगर्न दबाव दिएको र बिआरआई कार्यान्वयन नगर्न नेताहरुलाई धम्क्याउँदै आएको छ । बैसाख १८ गते काठमाडौं, कमलादीस्थित प्रज्ञा भवनमा भएको पत्रकार सम्मेलनमा नेकपाका महासचिव विप्लव सीले ‘विदेशी हस्तक्षेप तिब्र भएको’ भन्दै यसको संकेतसमेत गरेका थिए ।
अमेरिकी कुटनीतिज्ञहरुले जिल्ला–जिल्लामा पुगेर सिडिओलाई बिआरआईसँग जोडिएका परियोजनाको काम अघि नबढाउन, एमसीसी परियोजनालाई सुरक्षा दिन, नेकपाको निगरानी बढाउन र नेकपासँग सरकारी कामकाजमा सहकार्य नगर्न दबाव दिएको श्रोतको दावि छ ।
अमेरिकीहरुले सरकारमाथि तथा कर्मचारीमाथि दैलोदैलो चाहारेर ब्यापक दबाव दिइरहेकोले राष्ट्रिय स्वाधीनतामा नै चुनौती थपिएको नेकपाका स्थायी समिति सदस्य अनिल सीले बताएका छन् ।
