कैलाली । कैलालीको मोहन्याल गाउँपालिकाले ‘जनयुद्ध दिवस’को अवसरमा भोलि फागुन १ गते स्थानीय बिदा दिएको छ ।
सर्वोच्च अदालतले‘जनयुद्ध दिवस’मा बिदा दिने सरकारको निर्णय खारेज गरिसकेको छ । तैपनि गाउँपालिका अध्यक्ष देवीदत्त उपाध्यायले एक विज्ञप्ति जारी गर्दै गाउँपालिका भित्रका सम्पूर्ण कार्यालय तथा शैक्षिक संस्थामा स्थानीय बिदा दिएको जानकारी गराएका छन् ।
साथै,उक्त दिन सहिद बेपत्ता र घाइते भएका व्यक्तिहरू तथा आफन्तलाई सम्मान गर्ने कार्यक्रम रहेको समेत जनाएका छन् । उपाध्याय माओवादीबाट निर्वाचित गाउँपालिका अध्यक्ष हुन् । यसअघि सर्वोच्चले संक्रमणलीन न्याय प्रभावित हुनसक्ने तथा द्वन्द्वपीडितहरूको भावना चोट पर्न सक्ने भन्दै जनयुद्ध दिवसमा बिदा दिने निर्णय खारेज गरेको थियो ।
फागुन १ गते सशस्त्र द्वन्द्व सुरु भएको मितिलाई स्मरण गर्दै गत वर्ष मन्त्रिपरिषद्ले उक्त दिनलाई जनयुद्ध दिवसका रूपमा मनाउने र बिदा दिने निर्णय गरेको थियो । गत वर्ष २९ माघमा सरकारले गरेको यस निर्णयविरुद्ध रिटहरू दायर भएका थिए । त्यसको फैसला गर्दै सर्वोच्चले ‘जनयुद्ध’ शब्द संविधानले नचिनेको भन्दै खारेज गरेको थियो ।
