हेटौंडा । बागमती प्रदेशको मुख्यमन्त्रीमा नेपाली कांग्रेस प्रदेश संसदीय दलका नेता बहादुरसिंह लामा तामाङले दाबी पेस कार्यक्रम स्थगित भएको छ । यसअघि आज बिहान १० बजेको मुख्यमन्त्री दावी पेश गर्ने भनिएको थियो । तर, अन्तिम समयमा कार्यक्रम स्थगित गरिएको हो ।
कांग्रेस सांसद कुन्दनराज काफ्लेका अनुसार समयसीमा बाँकी नै रहेको र थप तयारी गर्नुपर्ने भएकाले आजका लागि दावी पेश गर्ने कार्यक्रम स्थगित गरिएको हो ।
कांग्रेस एमाले गठबन्धनबाट प्रदेशको मुख्यमन्त्रीमा दाबी पेस गर्ने तयारी गरेका लामाले अब मंगलबार मात्र दाबी गर्ने भएका छन् । लामाले मंगलबार बिहान मुख्यमन्त्रीमा दाबी गर्ने बताएका छन् । एमाले र कांग्रेसको सहमतिमा लामाको मुख्यमन्त्रीमा दाबी गर्ने कार्यक्रम रोकिएको बताइएको छ ।
सत्ता समीकरण परिवर्तन भएसँगै अल्पमतमा परेका मुख्यमन्त्री शालिकराम जम्कट्टेलले आइतबार पदबाट राजीनामा दिएका थिए । उनको राजीनामा लगत्तै प्रदेश प्रमुख यादवचन्द्र शर्माले संविधानको धारा १६८ (२) अनुसार सरकार गठनका लागि दाबी गर्न आह्वान गरेका थिए । आइतबार सूचना जारी गरेर साउन ८ गते (मंगलबार) साँझ ५ बजेसम्म दाबी पेस गर्न आह्वान गरिएको थियो ।
