काठमाडौं । नेपाली कांग्रेसका महामन्त्री विश्वप्रकाश शर्माले इलाम–२ ले अब काँध फेर्ने बताएका छन् । शनिवार इलाममा आयोजित चुनावी सभालाई सम्बोधन गर्दै उनले लामो समय एमालेले थापेको काँध यसपालि कांग्रेसले थाप्ने ठोकुवा गरे ।
महामन्त्री शर्माले लामो समयसम्म यो क्षेत्रबाट एमालेका सुवासचन्द्र नेम्वाङ निर्वाचित भएकामा अब इलामले काँध फेर्न खोजेको महामन्त्री शर्माले बताए ।
‘अब सुवास नेम्वाङज्यूको युगबाट नयाँ युगमा जाँदै गर्दा एउटा बलियो काँध लिएर हिजो सुवास नेम्वाङसँग केवल ११४ मात्रै मतले उपविजेता भएको उम्मेदवार अब दुई हजार बढी मतले जितेर उहाँका कामलाई पूरा गर्ने संकल्प गर्नुहुनेछ’, उनले भने । निर्वाचनअघिको गठबन्धन गलत हुने अनुभव गरेर कांग्रेस अहिले एक्लै निर्वाचनमा भाग लिइरहेको उनको भनाइ छ ।
‘नेपाली कांग्रेस पार्टी एक्लै चुनावमा रुख चिह्न लिएर खडा छ । यो एक्लै खडा भएको बेलामा त्यो दिन बिर्सिन मिल्दैन । हाम्रो अनुभवले के भन्यो भन्दा चुनावअघिको गठबन्धन गलत हुँदो रहेछ’, उनले भने ।
