काठमाण्डौं , १५ भदौ : विप्लव नेतृत्वको नेपाल कम्युनिस्ट पार्टीको आज बिहान बसेको स्थायी समितिको बैठकले चीनले हालै जारी गरेको नक्सामा नेपालको चुच्चे नक्सा समावेश नगरेको विषयलाई लिएर चिनियाँ दूतावासमा स्मरण पत्र बुझाउने निर्णय गरेको छ ।
साथै नेकपाले अमेरिकी अनुदान सहयोग सम्बन्धी परियोजना एमसिसीको विरोधमा छ जिल्लामा आन्दोलनका कार्यक्रम पनि घोषणा गरेको छ।
आज बिहान केन्द्रीय कार्यालय बुद्धनगरमा बसेको नेकपाको स्थायी कमिटी बैठकले संयुक्त गोष्ठी र मार्चपासका कार्यक्रम तय गरेको हो। घोषणा गरिएका कार्यक्रम अनुसार असोज १ गतेदेखि १५ गतेसम्म काठमाडौंसहित नुवाकोट, धादिङ, पाल्पा, नवलपरासी र रुपन्देहीमा एमसीसी विरोधीहरुको संयुक्त गोष्ठी गर्ने तयारी छ।
त्यसपछि फेरि अर्को बैठक बसेर दोस्रो चरणको आन्दोलनका कार्यक्रम घोषणा गर्ने सो पार्टीले जनाएको छ। आजकौ बैठकमा पछिल्लो राजनीतिक घटनाक्रमबारे छलफल र अमेरिकी सहयोग परियोजना एमसिसीलगायत चार दलीय समाजवादी मोर्चाको विषयमा पनि छलफल भएको जनाइएको छ । नेपाली विशेषताको समाजवाद स्थापना गर्नका लागि समाजवादी मोर्चा निरन्तर अघि बढ्ने नेकपाले जनाएको छ ।
