सुकुम्बासी बस्तीमा डोजर चलाएर उठिबास लगाएको सरकारले अहिले उनीहरूलाई ‘होल्डिङ सेन्टर’ को नाममा बन्दी बनाएको छ। कीर्तिपुरस्थित राधास्वामी सत्सङ केन्द्रमा राखिएका सुकुम्बासीहरूले आफूहरूले अपराधीले जस्तै ‘जेल’ को अनुभूति गरिरहेको भन्दै राज्यको अमानवीय व्यवहारको भण्डाफोर गरेका छन्।
**सुरक्षाको नाममा कडा घेराबन्दी**
होल्डिङ सेन्टरमा छिर्नेबित्तिकै सुकुम्बासीहरूले सुरक्षाकर्मीको आक्रामक र कठोर व्यवहार खेप्नुपरिरहेको छ। त्यहाँ नेपाल प्रहरी र सशस्त्र प्रहरीको बाक्लो पहरा छ। अचम्म त के छ भने, भित्रको वास्तविक अवस्था बाहिर नआओस् भन्नका लागि प्रवेशअघि नै क्यामेरा जफत गर्ने र मोबाइल फोनमाथि कडा निगरानी राख्ने काम भइरहेको छ।
हामीलाई जेलमा राखिएको छ
सेन्टरभित्र रहेका पीडितहरूले आफूहरूलाई मानसिक तनाव र त्रासमा राखिएको बताएका छन्। “हामी सुकुम्बासी हौँ, अपराधी होइनौँ,” भन्दै एक पीडितले आक्रोश पोखे, “तर यहाँको वातावरण देख्दा हामीलाई जेलमा कोचिएको जस्तो लाग्छ। न कतै जान पाइन्छ, न कसैसँग खुलेर बोल्न।”
बालबालिकाको भविष्यमाथि खेलबाड
नयाँ शैक्षिक सत्र सुरु भई अन्य बालबालिका स्कुल जान थालिसक्दा पनि सेन्टरमा रहेका सुकुम्बासी बालबालिका भने सुरक्षाकर्मीको बन्दुकको छायाँमा बस्न बाध्य छन्। उनीहरू कहिले विद्यालय फर्किन पाउने हुन्, त्यसको कुनै अत्तोपत्तो छैन।
प्रश्नको घेरामा सरकार
मानवअधिकार र बालअधिकारको धज्जी उडाउँदै सरकारले गरेको यो कार्यको चौतर्फी आलोचना भइरहेको छ। व्यवस्थापनको नाममा नागरिकलाई बन्धक बनाउने र सूचनाको हक समेत खोस्ने सरकारको यो कदमले लोकतान्त्रिक मूल्य-मान्यतामाथि नै गम्भीर प्रश्न उठाएको छ।
