काठमाडौं । नेपाल एमाले कोशी प्रदेशको नेतृत्वका लागि मतदान सम्पन्न भएको छ ।
नौ सय ७७ जना प्रतिनिधि सहभागी भएको मतदान राति दश बजेदेखि सुरु भई आज बिहान साढे ५ बजे सम्पन्न भएको हो ।
मतगणना दिउँसो १ बजेदेखि हुने र आजै परिणाम सार्वजनिक गर्ने तयारी रहेको प्रमुख निर्वाचन अधिकृत चुडामणि आचार्यले जानकारी दिए ।
दुई सय १५ सदस्यीय प्रदेश कमिटीका लागि भएको चुनावमा २० जनाले भने मतदान गरेनन् । एमाले कोशी प्रदेश अध्यक्षका लागि विनोद ढकाल र घनश्याम खतिवडा चुनावी प्रतिस्पर्धामा छन् ।
सचिवमा उदयपुरका शैलेश लामा र पाँचथरका राजकुमार भण्डारी उम्मेदवार छन् । यसैगरी २ जना उपसचिवका लागि ३ जनाको उम्मेदवारी परेको छ । जसमा खोटाङका देवान राई, मोरङका खेम नेपाली र झापाकी जलवर्षा राजवंशी उम्मेदवार छन् ।
जारी प्रदेश अधिवेशनमा उपाध्यक्षमा टीकाराम चेम्जोङसहित ४९ जना सदस्य निर्विरोध निर्वाचित भएका छन् ।
