काठमाडौं। बलिरामप्रसाद कुर्मीलाई जिल्ला प्रहरी कार्यालय बाराले नियन्त्रणमा लिएको छ। जिल्ला हुलाक कार्यालय कलैयाका निमित्त प्रमुख कुर्मीलाई बचतकर्ताको दुई करोड ७५ लाख रकम अपचलन गरेको आरोपमा प्रहरीले नियन्त्रणमा लिएको हो ।
हुलाक बचत बैंकबाट कुर्मीले दुई करोड ७५ लाख अपचलन गरेको कार्यको अनुसन्धान गर्न हुलाक विभागबाट पत्र नै आएपछि पक्राउ गरेर अनुसन्धान सुरु गरिएको बाराका प्रहरी उपरीक्षक गोबिन्द्र बोगटीले बताए।
हुलाक विभागको परिपत्रअनुसार बचतकर्ताको बचत रकम दुई करोड ७५ लाख रहेको छ भने त्यसको ब्याज जोड्दा चार करोडको हाराहारीमा पुग्ने बोगटीले बताए ।
हुलाक बचत बैंक,जिल्ला हुलाक कार्यालय बारा कलैयामा रकम जम्मा गरेका बचतकर्ताले आफ्नो रकम फिर्ताको माग गर्दै बाराका प्रमुख जिल्ला अधिकारीलाई महिना दिन पहिला गुहारेका थिए। हुलाक बचत बैंकले बचत रकम दिनमा आलटाल गरेको भन्दै बचत रकम फिर्ताका लागि पीडितले प्रजिअ नवराज सापकोटासमक्ष उजुरी नै दिएका थिए ।
हुलाक बचत बैंक,जिल्ला हुलाक कार्यालय बारा कलैयामा रकम जम्मा गरेका २६ जनाले लगभग दुई करोड बचत रकम फिर्ताको माग गर्दै हुलाक बैंकविरुद्ध उजुरी आएपछि त्यसको छानबिन गर्न हुलाक विभागलगायत सम्बन्धित निकायलाई जानकारी गराउँदाअनुसन्धानका क्रममा कुर्मी दोषी देखिएपछि उनी पक्राउ परेका बाराका प्रमुख जिल्ला अधिकारी नवराज सापकोटाले बताएका छन् ।
हुलाक बचत बैंक, जिल्ला हुलाक कार्यालय बारामा १४ सय बचतकर्ताले रकम जम्मा गरेका जिल्ला हुलाक कार्यालय बाराले जनाएको छ ।
