काठमाडौं। नेपाल चेम्बर अफ कमर्स र चाइना काउन्सिल फर प्रमोसन अफ इन्टरनेशनल ट्रेड (सीसीपी आईटी) बीच नेपालमा लगानी सम्मेलन गर्ने विषयमा सहमति भएको छ ।
प्रधानमन्त्री पुष्पकमल दाहालको चीन भ्रमणका क्रममा आइतवार भएको बीटूबी वार्तामा चेम्बर र सीसीपीआईटीबीच नेपालमा संयुक्त रूपमा लगानी सम्मेलन गर्ने सहमति भएको हो ।
पूर्वाधारका क्षेत्र, कृषि, पर्यटन, सूचना प्रविधिलगायत क्षेत्रमा चिनियाँ लगानी प्रोत्साहन गर्न संयुक्त लगानी सम्मेलन गर्न लागिएको चेम्बरका अध्यक्ष राजेन्द्र मल्लले जानकारी दिए ।
चिनियाँ निजीक्षेत्रसँग दुईपक्षीय आर्थिक एवं व्यापारिक सम्बन्धबारे समेत चेम्बरले उच्चस्तरीय छलफल गरेको छ । सीसीपीआईटीसँग मिलेर चेम्बरले नेपालमा आगामी वर्ष अन्तरराष्ट्रिय लगानी सम्मेलन गर्ने अध्यक्ष मल्लले बताए ।
अध्यक्ष मल्लले नेपालको जलविद्युत्, कृषि, सूचनाप्रविधि, पूर्वाधार विकासलगायत क्षेत्रमा लगानी गर्न चिनियाँ निजीक्षेत्रलाई आग्रहसमेत गरे ।
‘चिनियाँ लगानी आउने क्रम पनि उच्च छ, खासगरी उत्पादन वृद्धि, रोजगारी सृजना गर्ने महत्त्वपूर्ण परियोजनामा लगानीका लागि आग्रह गर्दछु,’ अध्यक्ष मल्लले भने । सीसीपीआईटीसँग मिलेर गर्ने लगानी सम्मेलन विदेशी लगानी आकर्षित गर्न महत्त्वपूर्ण हुने उनको भनाइ छ ।
अध्यक्ष मल्लले चीनसँगको सीमा नाकामा पूर्वाधार विकास गरेर आयात निर्यातलाई सहजीकरण गर्नुपर्नेमा जोडसमेत दिए । नेपाल–चाइना चेम्बर अफ कमर्सका अध्यक्ष एवं चेम्बर अफ कमर्सका निवर्तमान अध्यक्ष राजेशकाजी श्रेष्ठले सीसीपीआईटीसँग भएको लगानी सम्मेलनसम्बन्धी सहमति महत्त्वपूर्ण भएको बताए । नेपालमा पूर्वाधार विकास, पर्यटन, जलविद्युत्लगायत क्षेत्रमा चिनियाँ निजीक्षेत्रलाई लगानीका लागि आग्रह गरिएको श्रेष्ठले जानकारी दिए ।
सहमतिपत्रमा हस्ताक्षर कार्यक्रममा चेम्बर अध्यक्ष मल्लसहित निवर्तमान अध्यक्ष श्रेष्ठ, उपाध्यक्षहरू दीपक मल्होत्रा र उर्मिला श्रेष्ठ तथा त्रिभुवनधर तुलाधरको सहभागिता थियो ।
