टिकटकर तुल्सी अधिकारी विरुद्ध साइबर अपराधको मुद्दा दायर

सामाजिक सञ्जालमार्फत एक महिला र उनको परिवारको चरित्रहत्या गरेको आरोपमा टिकटकर तुल्सी अधिकारी विरुद्ध काठमाडौँ जिल्ला अदालतमा साइबर अपराधको मुद्दा दायर भएको छ। जिल्ला सरकारी वकिल कार्यालयले विद्युतीय कारोबार ऐन, २०६३ अन्तर्गत बिहीबार अभियोग पत्र दर्ता गरेको हो।

हाल चीनमा रहेकी अधिकारीले टिकटक लाइभमार्फत पीडितको परिवारबारे अश्लील र अपमानजनक टिप्पणी गरेको उल्लेख छ। उनलाई पक्राउ गर्न इन्टरपोलमार्फत प्रक्रिया अगाडि बढाइएको छ। दोषी ठहर भए ५ वर्षसम्म कैद वा १ लाख जरिबाना हुन सक्छ।