काठमाडौं महानगरपालिकाले डेंगी रोग फैलन नदिन लार्भा नस्ट गर्ने कार्य गर्ने भएको छ । यसका लागि महनगरले नेपालमै पहिलो पटक वायो लार्भिसिद औषधि छर्कने महानगर प्रमुख बालेन साहले बताएका छन् ।
साहले उक्त औषधि जैविक भएको र यसले लार्भाबाहेक कसैलाई हानी नगर्ने समेत जानकारी गराएका छन् । उनले लेखेका छन् ‘ यो विषादि होइन । औषधिलाई पानीको माथिलो भागमा छर्कनु पर्दछ । यसले लार्भाको पेटमा विष उत्पन्न गर्छ । यसबाट उसको पाचन प्रक्रिया नष्ट हुन्छ । यसबाट पूर्ण विकसित हुन नपाउँदै लार्भा मर्छ । औषधिले डेंगीसहित, फिलारिया, औलो (मलेरिया), चिकन्नीयाजस्ता रोग फैलाउने सबै प्रजातिका लामखुट्टेका लार्भा र प्युपा नष्ट हुनेछ ।’
साथै प्रमुख साहका अनुसार डेङ्गी रोगको बारेमा परामर्श दिन निःशुल्क हटलाइन टेलिफोन ११८० बाट २४ सै घण्टा सञ्चालनमा छ । अस्पताल जानु परे १०२ नम्बर सम्पर्क गरेर निःशुल्क एम्बुलेन्स प्रयोग गर्न सक्ने व्यवस्था मिलाइएको छ । स्वास्थ्य प्रवर्धन केन्द्रहरुमा डेंगी रोगको उपचारका लागि चाहिने सिटामोल, जीवन जल लगायत आवश्यक औषधिको वितरणको व्यवस्था मिलाइएको छ ।
