रसुवा । रसुवामा आएको विनाशकारी बाढीपछि प्रभावित क्षेत्रमा उद्धार र राहत कार्य तीव्र पारिएको छ। उद्धारका लागि नेपाली सेनाका ७ र निजी क्षेत्रका ८ गरी कुल १५ वटा हेलिकप्टर परिचालन गरिएको छ। हवाई साधनमार्फत हालसम्म ९७ जनाको सकुशल उद्धार गरिएको नेपाली सेनाले जनाएको छ।
बाढीका कारण हालसम्म १६ जनाको शव फेला परेको छ। रसुवा, नुवाकोट र धादिङका विभिन्न स्थानबाट यी शवहरू संकलन गरिएका हुन्। यस्तै, टिमुरे बजार क्षेत्रबाट ३२ जना सुरक्षाकर्मी (नेपाल प्रहरी र सशस्त्र प्रहरी) सहित दर्जनौँ स्थानीय नागरिकहरू अझै बेपत्ता रहेकाले खोजी कार्य जारी राखिएको छ।
उद्धार गरिएका घाइतेहरूको उपचारका लागि वीरेन्द्र अस्पतालको मेडिकल टोलीले त्रिशूलीस्थित नं.१ सैन्य तालिम केन्द्रमा आपत्कालीन स्वास्थ्य सेवा प्रदान गरिरहेको छ। विपद् व्यवस्थापनका लागि फिल्ड अस्पतालको सेटसहित आवश्यक मेडिकल सामग्री, औषधि र उपकरणहरू त्रिशूलीतर्फ पठाइएको छ। प्रभावित क्षेत्रमा बेपत्ताको खोजीका साथै अन्य मानवीय सहायता उपलब्ध गराउने काम भइरहेको छ।
