नेपालमा बिहीबार प्रतिनिधिसभा निर्वाचन सफलतापूर्वक सम्पन्न भएकोमा छिमेकी राष्ट्रहरू भारत र चीनले नेपाल सरकार तथा नेपाली जनतालाई बधाई दिएका छन्। भारतीय विदेश मन्त्रालयका प्रवक्ता रणधीर जैसवालले विज्ञप्ति जारी गर्दै प्रधानमन्त्री सुशीला कार्की र जनतालाई बधाई दिँदै नयाँ सरकारसँग सहकार्य गर्न भारत उत्सुक रहेको बताउनुभएको छ। भारतले निर्वाचनका लागि भौतिक सहयोग समेत उपलब्ध गराएको थियो।
त्यस्तै, नेपालका लागि चिनियाँ राजदूत झाङ माओमिङले शान्तिपूर्ण निर्वाचनको प्रशंसा गर्दै नेपालको स्थिरता र विकासका लागि चीन सधैँ साथमा रहने प्रतिबद्धता जनाउनुभएको छ। दुवै राष्ट्रले नेपालको लोकतान्त्रिक अभ्यास र समृद्धिको कामना गरेका छन्।
