निर्वाचनको मिति (फागुन २१) नजिकिएसँगै काठमाडौँ उपत्यकामा चुनावी रौनक ह्वात्तै बढेको छ। आफ्नो मताधिकार प्रयोग गर्न घर फर्किने यात्रुहरूको चापले बसपार्क र नाकाहरू भरिभराउ छन्। यातायात व्यवसायीका अनुसार फागुन १९ गतेसम्म करिब ८ लाख यात्रु बाहिरिने अनुमान छ। अचम्मको कुरा के छ भने, यसपटक व्यक्तिगतभन्दा पनि समूहगत र राजनीतिक दलहरूले ‘रिजर्भ’ गरेका बसहरूमा जानेको सङ्ख्या बढी छ।
काठमाडौँका सडकहरू अहिले सुनसान देखिन थालेका छन् भने ट्राफिक जाम पनि ५० प्रतिशतले घटेको छ। सुरक्षाका लागि ट्राफिक प्रहरीको ठाउँ म्यादी प्रहरीले लिएका छन्। निर्वाचन आयोगले फागुन २० गते रातिदेखि २१ गते साँझसम्म अत्यावश्यक बाहेकका सम्पूर्ण सवारी साधन सञ्चालनमा पूर्ण रोक लगाएको छ। यो ठुलो मानव सागरको चहलपहलले लोकतन्त्रको उत्सव र गाउँघरमा बढेको उत्साहलाई प्रस्ट पार्छ।
