भक्तपुर, । भक्तपुर नगरपालिकाको अठारौं नगरसभा आजबाट सुरु भएको छ। नगरसभाको उद्घाटन नेपाल मजदुर किसान पार्टीका सचिव तथा संघीय सांसद प्रेम सुवालले दीप प्रज्वलन गरी गर्नुभएको हो। उद्घाटन मन्तव्यमा सचिव सुवालले जनताको गाँस, बाँस र रोजगारी सुनिश्चित हुनेगरी नीति तथा कार्यक्रममा प्राथमिकता दिनुपर्ने धारणा राख्दै नगरसभा सफलताको शुभकामना व्यक्त गर्नुभयो।
उहाँले जनताबीच गरिएको प्रतिबद्धता अनुसार नेपाल मजदुर किसान पार्टीले आफ्नो घोषणापत्र कार्यान्वयन गरिरहेको र संविधान तथा स्थानीय सरकार सञ्चालन ऐन २०७४ द्वारा प्राप्त अधिकार प्रयोग गर्दै शिक्षा, स्वास्थ्य, सम्पदा संरक्षण, सरसफाइ, र विकास निर्माण जस्ता क्षेत्रमा महत्वपूर्ण कार्यहरू सम्पन्न गरिएको जानकारी दिनुभयो।
नीति तथा कार्यक्रममा उल्लेख गरिएका मुख्य बुँदाहरूमा:
भक्तपुरलाई ज्ञान–विज्ञानको केन्द्र बनाउने,
गुणस्तरीय उच्च शिक्षा सस्तो शुल्कमा सबैको पहुँचमा ल्याउने,
स्वास्थ्य सेवामा पहुँच सहज बनाउने,
सम्पदा संरक्षण, खेलकुद र कृषि क्षेत्रमा प्राथमिकता दिने,
सीपमूलक तालिममार्फत युवालाई आत्मनिर्भर बनाउने,
स्थानीय स्रोत र साधनको अधिकतम उपयोग,
सार्वजनिक र पर्ति जग्गा संरक्षण जस्ता विषयहरू समावेश छन्।
प्रमुख प्रजापतिले नगरभित्रका खोलाहरूको संरक्षणका लागि नापी नक्साअनुसार पर्खाल उठाई हरियाली प्रवर्द्धन, नगरप्रवेशका मुख्य नाकामा पार्क निर्माण, प्लाष्टिकको प्रयोग न्यूनिकरण, र फोहोर व्यवस्थापनमा सुधार गर्ने योजना सार्वजनिक गर्नुभयो।
साथै, नगर क्षेत्रभित्र पुराना स्थानहरूमा सवारीसाधन निषेध गर्दै लैजाने, पार्किङको समस्या समाधानमा विशेष पहल, र औद्योगिक क्षेत्रलाई अन्यत्र सार्ने योजना रहेको पनि उहाँले बताउनुभयो।
उपप्रमुख रजनी जोशीले युवाहरुलाई सीपमूलक तालिम र उद्यमशील ऋण प्रवाह गरी व्यवसायमा प्रोत्साहन गरिएको जानकारी दिनुभयो। उहाँले फोहोरबाट मल उत्पादन गरी कृषिमा प्रयोग गर्ने, प्रविधिमैत्री सेवा प्रवाहका लागि सफ्टवेयर प्रणालीमार्फत कर संकलन, नक्सा पास तथा प्रशासनिक कामकाज सहज बनाइएको जानकारी दिनुभयो।
कार्यक्रममा प्रमुख जिल्ला अधिकारी गोपालप्रसाद अर्याल, ख्वप अस्पतालका निमित्त मेडिकल डाइरेक्टर डा. मजेशप्रताप मल्ल, ख्वप इन्जिनियरिङ कलेजका प्राचार्य सुनिल दुवाल, बागमती प्रदेश सांसद सृजना सैंजु र सुरेन्द्रराज गोराई, तथा प्रमुख प्रशासकीय अधिकृत वसन्त भट्टराईलगायतले मन्तव्य राखेका थिए।
नगरसभाले भक्तपुरको समग्र विकासलाई थप गति दिने अपेक्षा गरिएको छ।
