काठमाडौँ- काठमाडौँमा जारी साफ महिला फुटबल च्याम्पियनशिपको फाइनलमा पुग्न नेपालले आज भारतसँग प्रतिस्पर्धा गर्दैछ ।
त्रिपुरेश्वरस्थित दशरथ रंगशालामा यो खेल आज साँझ ६:३० बजे शुरु हुने एन्फाले जनाएको छ ।
भारतले हालसम्म पाँचपटक साफ च्याम्पियनशिपको उपाधि जितेको छ भने नेपाल पाँचैपटक फाइनलमा पुगेर पराजित भएको छ ।
यसैगरी, आजै दिउँसो भएको खेलमा भुटानलाई ७-१ गोलले पराजित गर्दै बंगलादेश फाइनलमा पुगेको छ ।
दक्षिण एशियाका अफगानिस्तानबाहेक ७ मुलुक सहभागी प्रतियोगिताको समूह एमा बंग्लादेश, भारत र पाकिस्तान रहेका थिए भने समुह बीमा नेपालका साथै भुटान, श्रीलंका र माल्दिभ्स रहेका थिए ।
समुह चरणमा समुह एबाट बंग्लादेश ४ र भारत ३ अंक सहित र समुह बीबाट नेपाल र भुटान ४-४ अंक सहित सेमिफाइनलमा प्रवेश गरेका हुन् । यसअघी सन् २०२२ मा काठमाडौमा भएको प्रतियोगिताको फाइनल खेलमा बंग्लादेशले नेपाललाई पराजित गर्दै उपाधि जितेको थियो ।।
