पोखरा । नेकपा एमालेले गण्डकी प्रदेशमा मन्त्री हुनेको नाम टुंगो लगाएको छ । आइतबार बसेको मन्त्रिपरिषद बैठकले मन्त्रालयको संख्या ९ बनाएपछि एमालेले आफ्नो भागमा परेको चार ओटै मन्त्रालयमा मन्त्रीको नाम टुंगो लगाएको हो ।
एमालेबाट मन्त्री हुनेमा कास्कीका प्रकाशबहादुर केसी, बागलुङका कृष्ण पाठक, पर्वतका मित्रलाल बस्याल र नवलपुरकी पद्मा जिसी छन् । उनीहरुको आजै शपथ ग्रहणको तयारी छ ।
गण्डकी प्रदेशमा लामो समयदेखि पार्टी उपमहासचिव पृथ्वीसुब्बा गुरुङ र स्थायी कमिटी सदस्य खगराज अधिकारीको गुट सक्रिय छ । अहिले एमालेको भागमा परेको चार ओटै मन्त्रालयमा गुटगत छायाँ परेको छ ।
अहिले मन्त्री बनेका पाठक र केसी खगराज अधिकारी निकट तथा बस्याल र जिसी पृथ्वीसुब्बा गुरुङ निकट मानिन्छन् । गुट र भूगोलसमेत मिलाएर दलका नेता अधिकारीले आज बिहानमात्रै नाम टुंगो लगाएका हुन् ।
गण्डकीमा एमालेको मन्त्रीहरुको नाम टुंगो लगायो, मन्त्री छनौटमा पनि गुटगत छायाँ एमालेका २२ जना प्रदेशस सभा सदस्य रहेका छन् ।
गण्डकीमा ९ मन्त्रालयमध्ये मुख्यमन्त्री सुरेन्द्रराज पाण्डेलाई साथ दिने नेपाल समाजवादी पार्टीका फणीन्द्र देवकोटा र स्वतन्त्र सांसद राजीव गुरुङ (दीपक मनाङे)लाई पनि कांग्रेस कोटामै राखेर एमालेलाई ४ मन्त्रालय दिइएको हो ।
