कञ्चनपुर : नेपाल कम्युनिस्ट पार्टी निकट युवा संगठन नेपाल कञ्चनपुर जिल्ला समितिले वृक्षारोपण गरेको छ । शनिबार संगठनको आयोजनामा जिल्लाको बेदकोट नगरपालिका (७/८ )मा रहेको श्री बैजनाथ धाम जेष्ठ नागरिक सेवा केन्द्रको परिसरमा फलफूलका तथा अन्य बोट बिरुवा रोपेको हो ।
वातावरणीय पर्यावरणको सन्तुलन कायम राख्न र युवाहरुमा सकारात्मक सोचको प्रवाह गर्न वृक्षारोपण कार्य गरिएको युवा संगठन कञ्चनपुरका अध्यक्ष भरत सी ले बताए । पछिल्लो समय युवा जमात नराम्रा कुलतमा फसिरहेको बेला समग्र युवा जगतलाई समाज सेवा र देशभक्तिको भावना पैदा गर्न आफ्नो संगठनले यस्ता खाले सामाजिक अभियान गरिरहेको उनको भनाइ छ । यस अगाडि पनि युवा संगठनले लागू औषध सेवन विरुद्धको अभियान सञ्चालन गरेको थियो ।
आजको वृक्षारोपण कार्यक्रममा नेकपा जिल्ला इन्चार्ज विराट सी, अखिल क्रान्तिकारी केन्द्रीय सचिव प्रकाश सी, युवा संगठन महाकाली ब्युरो इन्चार्ज हर्क सी , अखिल क्रान्तिकारी महाकाली ब्युरो इन्चार्ज शंकर सी, केन्द्रीय सदस्य ललित सी, अखिल क्रान्तिकारी कञ्चनपुर संयोजक अनील सी लगायत अन्य नेता कार्यकर्ताहरुको सहभागिता रहेको जनाइएको छ ।
