कञ्चनपुर , २१ असार : नेपाल कम्युनिस्ट पार्टी जिल्ला समिति कञ्चनपुरले पहिलो चरण करिब दस कट्ठा जग्गामा उत्पादन कार्य अन्तर्गत धान खेती गर्ने भएको छ । नेकपाले बिहीबार जिल्लाको शुक्लाफाँटा नगरपालिका ०७ स्थित जग्गा भाडामा लिएर धान रोप्ने कार्य सम्पन्न गरेको हो ।
पार्टीले लिएको उत्पादन नीति अन्तर्गत आफूहरुले कञ्चनपुर जिल्लामा धान खेती गर्न लागेको नेकपा कञ्चनपुर सचिव दिवार सी ले बताएका छन । उनले भने ,“ पार्टी र नेता कार्यकर्ता आत्मनिर्भर बनाउने उदेश्यका साथ हामी श्रम र उत्पादनमा जोडिएका छौं । सुरुवाती चरण धान खेती लगाउँदै छौं र बिस्तारै यो उत्पादन कार्यलाई व्यवसायिकता संग जोड्ने योजना छ ।”
धान रोपाइँमा नेकपा केन्द्रीय सदस्य तथा महाकाली ब्युरो इन्चार्ज समर सी, नेकपा जिल्ला इन्चार्ज विराट सी लगायत अखिल (क्रान्तिकारी) केन्द्रीय सचिव प्रकाश सी र केन्द्रीय सदस्य ललित सी,मजदुर संगठनका केन्द्रीय सदस्य कमल सी लगायत अन्य नेता कार्यकर्ता र जनताको उपस्थिति थियो ।
त्यस्तै नेकपाले यस वर्ष मात्रै देशैभरि विभिन्न क्षेत्रमा उत्पादनका कार्यहरु गरिरहेको छ । कपिलवस्तु , चितवन , बर्दिया , सुनसरी, कैलाली लगायत धेरै जिल्लामा करिब ४० बिघा भन्दा बढी जमीनमा नेकपाले उत्पादन गरिरहेको छ ।
