बर्दिबास । महोत्तरीको बर्दिबासबाट बलात्कार घटनाका संलग्न दुई जनालाई प्रहरीले पक्राउ गरेको छ । दुई छुट्टाछुट्टै घटनामा संलग्न उनीहरुलाई बर्दिबासबाट पक्राउ गरिएको हो । बर्दिबास नगरपालिका–१ की ८ वर्षीया बालिकालाई बलात्कार गरेको आरोपमा मिथिला–१० लालगढ घर भई हाल बर्दिबास बस्ने ५७ वर्षका श्याम कार्की पक्राउ गरिएको जिल्ला प्रहरी कार्यालय महोत्तरीका प्रहरी नायव उपरीक्षक दिलीपकुमार गिरीले जानकारी दिनुभयो ।
त्यस्तै एक मानसिक सन्तुलन ठीक नभएकी २१ वर्षीय महिलालाई बलात्कार गरेको आरोपमा बर्दिबास–११ खयरमाराबाट ४५ वर्षका सोमबहादुर थिङलाई पनि प्रहरीले पक्राउ गरेको छ ।
जिल्लाको एकै पालिकाका एक बालिका र एक युवतीमाथि जबर्जस्ती करणी गरेको निवेदन आएपछि प्रहरीले सोमबार दुवै घटनाका आरोपीलाई पक्राउ गरी थुनामा राखेको प्रहरीले जनाएको छ ।
पक्राउ परेका कार्कीलाई ५ दिन र थिङलाई ४ दिनको म्याद जिल्ला अदालत महोत्तरीबाट थप गरी अनुसन्धान गरिरहेको जिल्ला प्रहरी कार्यालय महोत्तरीले जनाएको छ ।
