काठमाडौं । अर्थमन्त्री डा. प्रकाशशरण महतले आर्थिक वर्ष २०८०-८१ को बजेट पेश गर्दै यो वर्ष मदन भण्डारी विज्ञान तथा प्रविधि विश्वविद्यालय सञ्चालन गर्ने घोषणा गरेका छन् ।
सरकारले मदन भण्डारी विज्ञान तथा प्रविधि विश्वविद्यालय ऐन, २०७९ समेत जारी गरिसकेकाे छ ।
विगत चार वर्षदेखिका नीति तथा कार्यक्रम र बजेटमा विश्वविद्यालय सञ्चालन गर्ने याेजना राखिए पनि पूर्वाधार निर्माणकै काम पूरा हुन सकेकाे थिएन ।
नेकपा एमालेका तत्कालीन महासचिव मदन भण्डारीका नाममा स्थापना गर्न लागिएको यो विश्वविद्यालय यसै आर्थिक वर्षदेखि सञ्चालन गर्ने तयारी गरिएकाे छ ।
विश्वविद्यालयमा करिब चार हजार विद्यार्थीलाई अध्यापन गराउने क्षमता हुने बताइएकाे छ । त्यस्तै विश्वविद्यालयको पूरा परियोजना सम्पन्न गर्न ४३ अर्ब रुपैयाँ लागत लाग्ने अनुमान छ ।
आफ्नै स्रोतमा विश्वविद्यालय निर्माण गर्न गाह्रो हुने देखेपछि सरकारले चीन सरकारसँग सहकार्य खोजेको थियो । यस विषयमा रुचि देखाए पनि बहाना देखाउँदै हाल चीन यो परियोजनाबाट बाहिरिएको बुझिन्छ ।
यो विश्वविद्यालय काभ्रेपलाञ्चोकको पाँचखाल र मकवानपुरको चित्लाङमा गरी दुई ठाउँमा सञ्चालन हुनेछ । काभ्रेपलाञ्चोकमा केन्द्रीय कार्यालय र मकवानपुरमा विभिन्न विभाग हुने बताइएको छ ।
हालसम्म काभ्रेपलाञ्चोकमा जग्गा अधिग्रहणको काम मात्र सम्पन्न भएको छ । जिल्ला मालपोत कार्यालय धुलिखेलका अनुसार १० हजार ३०० रोपनी जग्गा विश्वविद्यालयको नाममा गइसकेको छ । यता चित्लाङमा भने भौतिक पूर्वाधारको केही काम सकिएपनि धेरै बाँकी नै रहेको छ ।
