काठमाडौं । सञ्चार तथा सूचना प्रविधि मन्त्री रेखा शर्मासँग अब भर्चुअल संवाद गरेर सुझाव र गुनासो टिपाउन सकिनेछ । सञ्चार तथा सूचना प्रविधि मन्त्रालयले कार्य सम्पादनलाई प्रभावकारी बनाउन मन्त्री रेखा शर्मासँग भर्चुअल संवाद गर्न सकिने व्यवस्था गरिएको हो ।
मन्त्रालयबाट हुने कार्य सम्पादनलाई प्रभावकारी बनाउन नागरिकका सुझाव र गुनासोलाई सहज रूपमा प्राप्त गर्न भर्चुअल संवादको व्यवस्था गरिएको मन्त्रालयले जनाएको छ । यसका लागि मन्त्रालयको वेबसाइटमा ‘मन्त्रीसँग भर्चुअल संवाद’ प्लेटफर्म थप गरिएको छ ।
कसरी गर्ने भर्चुअल संवाद ?
सुरूमा सञ्चार तथा सूचना प्रविधि मन्त्रालयको वेबसाइटमा जानुहोस् । त्यसपछि वेबसाइट खुल्छ र स्क्रोल गर्दै तलतिर जानुहोस् । तर तपाईले मन्त्रीसँग भर्चुअल संवाद भन्ने विकल्प देख्न सक्नुहुनेछ ।
त्यसपछि त्यहाँ मन्त्रीलाई आफ्नो कुरा लेख्नुहोस् भन्ने ठाउँमा क्लिक गरेर वा यहाँ क्लिक गरेर पनि सोझै सुझाव वा गुनासो टिपाउन सक्नुहुनेछ ।
सुझाव वा गुनासो टिपाउँदा आफ्नो नाम, सम्पर्क नम्बर, ठेगाना, इमेल र सन्देश लेखेर क्याप्चा कोड राखेर पठाउन सकिने छ ।
