सरकारले अध्यादेशमार्फत निजामती कर्मचारी सङ्गठनहरू खारेज गरेपछि कर्मचारीहरूले अन्तर्राष्ट्रिय श्रम सङ्गठन (आईएलओ) मा उजुरी दिएका छन्। आफ्नो खारेजी असंवैधानिक र अन्तर्राष्ट्रिय अभिसन्धी विपरित भएको दाबी गर्दै उनीहरूले जेनेभास्थित मुख्य कार्यालयमा उजुरी दर्ता गराएका हुन्।
विगठित नेपाल निजामती कर्मचारी सङ्गठनकी अध्यक्ष भवानी दाहालका अनुसार, नेपालमा क्रियाशील सम्पूर्ण ट्रेड युनियनहरूको यसमा सहभागिता छ। सरकारले गत साता अध्यादेश जारी गर्दै सरकारी निकायमा ट्रेड युनियन गतिविधिमा पूर्ण प्रतिबन्ध लगाएको थियो। यसबारे आईएलओले सरकारलाई पत्राचार समेत गरिसकेको छ।
