काठमाडौँ । प्रविधिमैत्री शिक्षणतर्फ महत्वपूर्ण कदम चाल्दै काव्या स्कुलका ३५ भन्दा बढी शिक्षकहरू गुगल सर्टिफाइड एजुकेटर बनेका छन् । हालै सम्पन्न विशेष तालिमपछि उनीहरूले यो अन्तर्राष्ट्रिय मान्यता प्राप्त प्रमाणपत्र हासिल गरेका हुन् । विद्यालय परिसरमा आज आयोजित एक औपचारिक कार्यक्रममा नवप्रशिक्षित शिक्षकहरूलाई प्रमाणपत्र प्रदान गरिएको हो । उक्त तालिम ‘डिजिटल एन्ड वियोन्ड’ का सह–संस्थापक सगुन ढुङ्गानाले सञ्चालन गरेका थिए ।
प्रशिक्षक ढुङ्गानाका अनुसार शिक्षकहरूले लेभल १ (प्रारम्भिक) र लेभल २ (एड्भान्स) दुवै तहको तालिम सफलतापूर्वक पूरा गरेका छन् ।ढुङ्गानाले भने, “अब शिक्षकहरू गुगलका विभिन्न डिजिटल टुल्स प्रयोग गरी शिक्षण सिकाइ प्रक्रियालाई अझ व्यवस्थित, प्रभावकारी र आकर्षक बनाउन सक्षम भएका छन् ।” साथै, इच्छुक शिक्षकहरूले भविष्यमा सर्टिफाइड ट्रेनर वा इनोभेटर बन्ने अवसरसमेत पाउनेछन् ।
ढुङ्गानाले वर्तमान सन्दर्भमा प्रविधिको बढ्दो प्रभावबारे उल्लेख गर्दै भने, “आजका विद्यार्थीहरूको हातमा स्मार्ट डिभाइस छ र एआईको प्रयोग तीव्र रूपमा बढिरहेको छ । यस्तो अवस्थामा शिक्षकहरूलाई प्रविधिसँग अभ्यस्त बनाउनु अत्यन्त आवश्यक छ ।”
विद्यालयका प्रिन्सिपल नवराज बास्कोटाले यस तालिमलाई विद्यालयका लागि ठूलो उपलब्धि भएको बताए । उनका अनुसार, यस्तै कोर्सहरू सामान्यतया विदेशमा सशुल्क रूपमा मात्र उपलब्ध हुने गर्छन् । “शिक्षकहरू प्रविधिमैत्री हुँदा कक्षाकोठा पनि आधुनिक बन्छ । जसले विद्यार्थीको सिकाइमा प्रत्यक्ष सकारात्मक प्रभाव पार्ने विश्वास व्यक्त गरे ।
तालिममा सहभागी शिक्षकहरूले पनि अब डिजिटल टुल्सको प्रयोगले पठनपाठन अझ सहज, रोचक र प्रभावकारी हुने बताए । नेपालमा हालसम्म सीमित विद्यालयहरूले मात्र यस्तो प्रकारको प्रविधिमैत्री शिक्षण प्रणाली अवलम्बन गरेका छन् । यस्तो पहलले नेपाली शिक्षा प्रणालीलाई डिजिटल रूपान्तरणतर्फ अघि बढाउने अपेक्षा गरिएको छ ।
