नयाँ बानेश्वरमा टिपरको ठक्करबाट सरकारी कर्मचारीको मृत्यु

काठमाडौँको नयाँ बानेश्वरमा मंगलबार बिहान टिपरको ठक्करबाट एक सरकारी कर्मचारीको मृत्यु भएको छ। बिजुलीबजारबाट तिनकुनेतर्फ गइरहेको बा २ क ३२२९ नम्बरको टिपरले ठक्कर दिँदा स्कुटर चालक ४८ वर्षीय बद्री कोइरालाको ज्यान गएको हो। सुनसरीका कोइराला भक्तपुरस्थित राष्ट्रिय क्षयरोग केन्द्रमा नायब सुब्बा पदमा कार्यरत थिए। प्रहरीले टिपर चालक २६ वर्षीय विकास थापामगरलाई नियन्त्रणमा लिएको छ। फोहोर संकलनमा प्रयोग हुने उक्त टिपरले ठक्कर दिएको बारे थप अनुसन्धान भइरहेको छ।