महोत्तरी । महोत्तरीको गौशाला नगरपालिका–५, गौशाला बजारस्थित एक घरमा प्रहरीले छापा मार्दै करिब १८ लाख रुपैयाँ बराबरको भन्सार छलीका लत्ता कपडा बरामद गरेको छ।
इलाका प्रहरी कार्यालय गौशालाका प्रहरी निरीक्षक रमेश लामाको कमान्डमा गएको टोलीले स्थानीय सुबोध यादवको घरमा खोजतलासी गर्दा भारत, पश्चिम बंगाल, कोलकाताका ३६ वर्षीय मनोज राय बस्दै आएको पत्ता लागेको हो।
प्रहरीका अनुसार, भदौ ४ गते राति प्राप्त विशेष सूचनाका आधारमा छापा मारिएको थियो। तलासीका क्रममा लत्ता कपडासँगै घरभित्र एक थान हरिणको सुकेको छाला (आखेटोपाहार) समेत फेला परेको छ।
मनोज रायलाई नियन्त्रणमा लिई थप अनुसन्धान अघि बढाइएको छ। बरामद गरिएका सामान आवश्यक प्रक्रिया पूरा गरी भन्सार कार्यालय बुझाउने कार्य भइरहेको जिल्ला प्रहरी कार्यालय महोत्तरीले जनाएको छ।
आखेटोपाहारको विषयमा थप अनुसन्धान भइरहेको प्रहरीले जनाएको छ। महोत्तरी भारतसँग जोडिएको खुला सीमावर्ती जिल्ला भएकाले वर्षौँदेखि भन्सार छलीका सामान नेपाल भित्रिने घटना दोहोरिँदै आएको छ। निगरानी प्रणालीका बाबजुद पनि यस्तो गतिविधि रोकथाममा चुनौती कायम रहेको प्रहरीको भनाइ छ।
