भक्तपुर । मठभित्र दुई कक्षाबाट सुरु भएको श्री पद्म हाई स्कूल, भक्तपुरले एक सय एक वर्षको यात्रा पूरा गरेको छ । १९८१ सालमा भादगाउँ इङ्लिस स्कूल नामले सुरु भएको यो विद्यालय आज प्रदेशमै उत्कृष्ट र राष्ट्रमै तृतीय स्थानमा उभिएको छ ।
विद्यालयलाई २००३ सालमा श्री ३ पद्मशमशेरले “हाई स्कूल” को मान्यता दिएसँगै यसले भक्तपुरमा शिक्षा क्रान्तिको आधार तयार गर्यो । नि:शुल्क शिक्षाले गरिब घर–परिवारमा पनि ज्ञानको उज्यालो फैलायो ।
राणा शासनकालमा शिक्षा दिनेलाई जेल हाल्ने परिस्थिति थियो । तर पनि जगतबहादुर अमात्य, शिवप्रसाद मिश्र, आद्याचरण राजभण्डारीजस्ता शिक्षासेनानीले विद्यालयलाई निरन्तरता दिए ।
२०७२ सालको महाभूकम्पले विद्यालयको ऐतिहासिक भवन भत्कायो तर प्रेरणा भत्किएन । अहिले प्रदेश सरकार, शिक्षा मन्त्रालय र समुदायको सहकार्यमा नयाँ ब्लक र होस्टेल निर्माण भइरहेका छन् ।
उत्कृष्टताको मान्यता
२०७९ सालमा शिक्षा मन्त्रालयको गुणस्तर परीक्षणमा ९०.५७ अंक प्राप्त गर्दै विद्यालय प्रदेशमै प्रथम र राष्ट्रमै तृतीय बनेको थियो ।
प्रअ हाडा भन्छन् :
“हाम्रो विद्यालय अझै पनि अधुरो भवन र बजेट अभावबीच संघर्षरत छ । तर प्रविधिमैत्री शिक्षा, व्यवहारिक ज्ञान र नेतृत्व विकासका साथ भविष्यतिर अघि बढ्ने संकल्पमा छौं ।”
श्री पद्म हाई स्कूलको यात्रा केवल इतिहास होइन, आज पनि जीवित प्रेरणा बनेको छ — जहाँ पढाइसँगै संस्कार, जीवन र भविष्य सिकाइन्छ ।
