भक्तपुर। भक्तपुरस्थित नीलबाराही मन्दिर संरक्षण अभियान अन्तर्गत भइरहेको श्रमदान कार्यक्रम केही दिनदेखि रोकिएको छ। लगातारको वर्षाले वालमा राखिएको माटो बगाएपछि स्थानीय प्रशासनले डोजर तथा माटो ढुवानी गर्ने गाडी संचालनमा रोक लगाएको हो।
मन्दिरमा हुने जात्रा तथा मेलाका लागि पुरानै संरचनाको बाटो निर्माण हुनुपर्ने भन्दै स्थानीयवासी विगत दुई महिनादेखि उल्लेखनीय संख्यामा श्रमदानमा सहभागी हुँदै आएका थिए। तर हिजो डोजर प्रशासनले नियन्त्रणमा लिएपछि आज बिहानदेखि स्थानीय आन्दोलित बनेका छन्।
उनीहरूले मन्दिर जाने मुख्य गेटमा धर्ना दिँदै नाराबाजी गरेका छन्। श्रमदानमार्फत मन्दिर संरक्षणमा जोडिएका उनीहरूले प्रशासनको कदमले स्थानीय इच्छाशक्ति र परम्परागत संरचना जोगाउने प्रयासलाई कमजोर बनाएको आरोप लगाएका छन्।
