सिरहा, । सिरहा जिल्लाको नरहा गाउँपालिका–३ स्थित मिचैंया–चोहर्वा सडकखण्डबाट कटुवा पेस्तोलसहित तीन जना भारतीय नागरिक पक्राउ परेका छन्। भारतबाट नेपाल छिरेर गोलबजारतर्फ जाँदै गरेका ती व्यक्तिहरूलाई इलाका प्रहरी कार्यालय मिर्चैयाको टोलीले शंका लागी रोकजाँच गर्दा एक थान कटुवा पेस्तोल बरामद भएको हो।
पक्राउ पर्नेमा भारतको मधुवनी जिल्लाका ऋषि नाथ मण्डल (१९), ओम शंकर यादव (२०), र आकाश कुमार मण्डल (१९) रहेका छन्। प्रहरीले जनाएअनुसार पेस्तोल आकाश मण्डलको कम्मरमा लुकाई राखिएको अवस्थामा फेला परेको हो।
पक्राउ परेकाहरूलाई इलाका प्रहरी कार्यालय मिर्चयामा राखेर अनुसन्धान जारी राखिएको छ। हातहतियार अवैधरूपमा नेपाल भित्र्याउने प्रयास हुन सक्ने आशङ्का गर्दै जिल्ला अदालतबाट तीन दिनको म्याद लिइएको प्रहरीले जानकारी दिएको छ।
