पर्यटन, संस्कृति र वातावरणको संगमस्थलमा उदाहरणीय प्रयास
भक्तपुर । विश्व सम्पदा सूचीमा सूचीकृत चाँगुनारायण मन्दिर क्षेत्र संरक्षणको अभियानमा स्थानीय बासिन्दा,वडा कार्यालय र विभिन्न संघसंस्थाहरूको सहकार्यमा एक भव्य सरसफाइ तथा वृक्षारोपण कार्यक्रम सम्पन्न भएको छ ।
धार्मिक,सांस्कृतिक र पर्यटकीय दृष्टिले विशिष्ट स्थान राख्ने चाँगुनारायण क्षेत्रलाई स्वच्छ र हरित राख्न स्थानीयहरूको सक्रियता दिनप्रतिदिन उदाहरणीय बन्दै गएको छ ।
यसपटकको अभियान द हिमालयन इन्टरपेड प्रालिको समन्वयमा चाँगुनारायण नगरपालिका , वडा लगायत विभिन्न संघसंस्थाहरुको सहकार्यमा सम्पन्न भएको थियो ।
कार्यक्रममा युवादेख वृद्धसम्म,सामाजिक अभियन्तादेखि जनप्रतिनिधिसम्मको उत्साहजनक उपस्थिति देखिन्थ्यो।स्थानिय समाजसेवी बलबहादुर भन्नुहुन्छ,“वातावरण जोगाउनु हाम्रो कर्तव्य हो । ग्लोबल वार्मिङ बढिरहेको बेला यस्ता कार्यक्रमले जनचेतना बढाउने काम गर्छ।”
कार्यक्रमपछिको क्षणमा पसिनाले भिजेका बलबहादुरले बाटै मा पर्ने हरियाली देखाउँदै गर्वसाथ सुनाए “केही वर्षअघि यो पुरै नाङ्गो डाँडा थियो । हामीले वृक्षारोपण गरेपछि आज यो जंगल जस्तो देखिन्छ। हामी सबैले मिलेर सम्भव बनायौं ।”
यस अभियानले चाँगुनारायण क्षेत्रको प्राकृतिक सौन्दर्य मात्र हैन,पर्यटक मैत्री वातावरण निर्माणमा पनि योगदान दिएको छ। संरक्षण र सरसफाइको यो संस्कृति विस्तार गर्दै जान सकियो भने चाँगुनारायण पर्यावरणीय रूपमा पनि उदाहरणीय गन्तव्य बन्नेछ ।
