कैलाली । सुदूरपश्चिम प्रदेश लोक सेवा आयोगले फागुन २० गते जारी गरेको विज्ञापनअनुसारको बढुवा परीक्षा सर्वोच्च अदालतको आदेशपछि स्थगित गरिएको छ। नवौँ तहका अप्राविधिक/प्राविधिक अधिकृत पदका लागि तय गरिएको परीक्षा कार्यक्रम स्थगित भएको आयोगले सूचना जारी गर्दै जनाएको हो। सर्वोच्च अदालतले वैशाख २४ गते अल्पकालीन आदेश जारी गर्दै अर्को आदेश नभएसम्म परीक्षा नगर्न भनेपछि आयोगले परीक्षा प्रक्रिया अगाडि नबढाउने निर्णय गरेको हो।
आयोगले सामान्य प्रशासनबाट ज्येष्ठता र कार्यसम्पादन मूल्यांकनका आधारमा ७ जना, राजस्वबाट १ जना र कार्यक्षमताका आधारमा प्राविधिक तर्फ ७ जना र राजस्वबाट १ जनाका लागि विज्ञापन खुलाएको थियो। तर, वन तथा कृषि समूहका उम्मेदवारले आन्तरिक प्रतिस्पर्धाको अवसर नपाएको भन्दै सर्वोच्चमा रिट दिएका थिए।
