काठमाडौं । काठमाडौंको तीनकुनेमा चैत १५ गते भएको हिंसात्मक प्रदर्शनमा संलग्न भएको आरोपमा फरार रहेका दुर्गा प्रसाई र उनका अंगरक्षक दीपक खड्कालाई प्रहरीले नियन्त्रणमा लिएको छ ।
नेपाल प्रहरीले जारी गरेको प्रेस विज्ञप्तिका अनुसार उनीहरूलाई आज (चैत २९ गते) झापा जिल्लाको भद्रपुरबाट पक्राउ गरिएको हो। दुर्गा प्रसाईमाथि राज्य विरुद्धको अपराध तथा संगठित आपराधिक क्रियाकलापमा संलग्न रहेको आरोप छ। यस्तै, सोही घटनामा संलग्न प्रसाईका अंगरक्षक दीपक खड्कालाई पनि नियन्त्रणमा लिइएको हो ।
तीनकुनेमा भएको प्रदर्शन शान्तिपूर्ण नभई हिंसात्मक रूप लिएको थियो, जसले सार्वजनिक शान्ति सुरक्षामा चुनौती सिर्जना गरेको प्रहरीको दाबी छ। सो घटनासँग सम्बन्धित अन्य पक्षहरूमाथि पनि अनुसन्धान भइरहेको जानकारी दिइएको छ।
प्रहरी स्रोतका अनुसार, पक्राउ परेका दुर्गा प्रसाई र उनका अंगरक्षकलाई थप अनुसन्धानका लागि काठमाडौं ल्याइएको छ। उनीहरूलाई संगठित अपराध ऐन तथा विद्यमान कानुनी प्रावधानअनुसार कारबाही प्रक्रिया अगाडि बढाइने जनाइएको छ।
नेपाल प्रहरीका केन्द्रीय प्रवक्ता प्रहरी नायब महानिरीक्षक (डीआईजी) डा. डिनेश कुमार आचार्यले हस्ताक्षरित प्रेस विज्ञप्तिमा उक्त जानकारी सार्वजनिक गरिएको हो।
