काठमाडौं ।नेपाली कांग्रेसका उपसभापति धनराज गुरुङले संघीयताको प्रभावकारी कार्यान्वयनका लागि पुनःसंरचना आवश्यक रहेको बताएका छन्। सोमबार पार्टी केन्द्रीय कार्यालयमा आयोजित कार्यक्रममा उनले संघीय संसद् र प्रदेश सभामा सांसदहरूको संख्या घटाउनुपर्ने बताएका हुन्।
गुरुङका अनुसार २७५ सदस्यीय प्रतिनिधि सभालाई समावेशी र समानुपातिक सिद्धान्तलाई कायम राख्दै १६५ मा झार्न सकिन्छ। प्रदेशसभामा समेत सांसदहरूको संख्या धेरै भएकाले संघीयता प्रभावकारी हुन नसकेको उनको धारणा छ।
उनले संघीयताको नाममा वितरणमुखी प्रक्रियामा रमाउने प्रवृत्तिले सधैं प्रश्न उठिरहने भन्दै उत्पादनलाई केन्द्रबिन्दु बनाउनुपर्ने बताए। साथै, संघीयताको सफल कार्यान्वयनका लागि पुँजी निर्माणलाई प्राथमिकता दिन जरुरी रहेको उनले उल्लेख गरे।
