काठमाडौं । एक नाइट क्लबमा आगलागी हुँदा १३ जनाको मृत्यु भएको छ ।
स्पेनको दक्षिण–पूर्वी सहर मुर्खियाको एक नाइट क्लबमा
आइतबार बिहान आगो सल्किएको र त्यसको चपेटामा अन्य दुई क्लब पनि परेको हुँदा १३ जनाको मृत्यु भएको हो ।
प्रहरीका अनुसार ला फोन्डा नामको नाइट क्लबबाट आगो सल्किएको थियो । त्यसबेला उक्त क्लबमा मानिसहरुको भिडभाड रहेको जनाइएको छ । आगो लागेसँगै डान्स फ्लोरमा मानिसहरुबीच भागदौड मच्चिएको प्रहरी अधिकारीले जनाएका छन् ।
उक्त घटनामा मृत्यु हुने अधिकांश जन्मोत्सव मनाइ रहेको परिवारका सदस्यहरु रहेको स्थानीय सञ्चारमाध्यमलाई उद्धृत गर्दै बीबीसीले उल्लेख गरेको छ ।
अधिकारीहरुले मृत्यु हुनेको संख्या बढ्न सक्ने जनाएका छन् । साथै अझै १४ जना बेपत्ता रहेको जनाइएको छ । उद्धारकर्ताहरुले भग्नावशेष क्षेत्रमा खोजी कार्य जारी राखेका छन् ।
एक २८ वर्षीया महिलाले आफ्नी आमालाई पठाएको भ्वाइस म्यासेजमा भनेकी छन्, ‘आमा, म तपाईंलाई धेरै माया गर्छु । हाम्रो यहाँ मृत्यु हुनेछ ।’
आफ्नो पार्टनर र साथीहरुसँग उक्त क्लबमा गएकी ती महिला जीवित छिन् वा छैनन् भन्ने खुल्न सकेको छैन ।
