काठमाडौं । राष्ट्रपति रामचन्द्र पौडेलले प्रमाणीकरण गरेको नयाँ नागरिकता ऐन कार्यान्वयन हुने भएपछि नागरिकता पीडितले खुसीयाली मनाएका छन् । सर्वोच्च अदालतले बिहीबार नयाँ नागरिकता विधेयक कार्यान्वयनका लागि बाटो खुला गरिदिएको छ। लगत्तै नागरिकता पीडित संघर्ष समितिले काठमाडौंको माइतीघरमा जम्मा भएर खुशियाली मनाएकाे हाे ।
राष्ट्रपतिले प्रमाणीकरण गरेको नागरिकता विधेयकमा जन्मका आधारमा नागरिकता लिएका नेपालीको सन्तानलाई वंशजको नागरिकता दिने व्यवस्था छ । तर, उक्त विधेयक प्रमाणीकरणविरुद्ध परेको रिटमा गत जेठ २२ गते सुनुवाइ गर्दै सर्वोच्च अदालतले विधेयक कार्यान्वयन नगर्न अल्पकालीन अन्तरिम आदेश दिएको थियो । सर्वोच्चको आदेशपछि जन्मसिद्ध नागरिकका सन्तानले माइतीघर केन्द्रित आन्दोलन गर्दै आएका थिए ।
बिहीबार न्यायाधीश डा. आनन्दमोहन भट्टराई र कुमार रेग्मीको इजलासले नागरिकता विधेयक कार्यान्वयनमा रोक लगाउने यसअघिको अल्पकालीन अन्तरिम आदेशलाई निरन्तरता नदिन आदेश दिएको हो । यससँगै अब जन्मका आधारमा नागरिकता पाएकाहरुको सन्तानले नागरिकता पाउने भएका छन् ।
