भक्तपुर । भक्तपुर मालपोत कार्यालयमा घुस लिएको अभियोगमा प्रमुख मालपोत अधिकृत कुमार आचार्य र कार्यालय सहयोगी टिकाराम राउत पक्राउ परेका छन्। अख्तियार दुरुपयोग अनुसन्धान आयोगको टोलीले उनीहरूलाई मंगलबार दिउँसो कार्यालयबाटै २४ लाख ५० हजार रुपैयाँसहित पक्राउ गरेको हो।
आयोगका अनुसार उक्त रकम जग्गाको लगतकट्टा प्रक्रियामा घुसस्वरूप मागिएको थियो। रकम कार्यालय सहयोगी राउतको साथबाट फेला परेको भए पनि प्रमुख अधिकृत आचार्यको मिलेमतोमा उठाइएको आयोगको प्रारम्भिक अनुसन्धानबाट खुलेको छ।
पक्राउपछि आयोगले प्रमुख अधिकृत आचार्यका दुई मोबाइल फोनसमेत बरामद गरी अनुसन्धान थालेको जनाएको छ। घुसकाण्डबारे थप अनुसन्धान जारी रहेको आयोगले जानकारी दिएको छ।
यस घटनाले सरकारी सेवामा व्याप्त भ्रस्टाचारमाथि पुनः प्रश्न उठाएको छ भने मालपोत कार्यालयमा सेवाग्राहीहरूले भोग्दै आएको सास्तीको एक झल्कोसमेत दिएको छ।
