काठमाडौं । उज्यालो नेपालका नायक’ भनेर चिनिएका पूर्व नेपाल विद्युत प्राधिकरणका कार्यकारी निर्देशक कुलमान घिसिङको पुनर्बहालीको माग गर्दै आज काठमाडौंमा हजारौं नागरिकले भव्य प्रदर्शन गरेका छन् ।
कुलमान घिसिङ पुनर्बहाली संयुक्त आन्दोलन परिचालन समितिको ब्यानरमा आयोजना गरिएको यस प्रदर्शनमा विभिन्न तह, क्षेत्र र पेसामा आवद्ध नागरिकहरूको उल्लेखनीय उपस्थिति रहेको थियो। र्यालीले काठमाडौंका प्रमुख सडकहरू परिक्रमा गर्दै घिसिङको कामको प्रशंसा गर्यो र सरकारलाई उनको पुनः नियुक्तिका लागि दबाब दियो।
प्रदर्शनमा सहभागीहरुले “उज्यालो नेपालका नायकलाई फर्काऊ”, “कुलमान फर्क, देश बचाऊ”, “राजनीतिक हस्तक्षेप बन्द गर” लगायतका नारासहित ब्यानर, प्लेकार्ड र राष्ट्रिय झन्डा बोकेका थिए। केही स्थानहरूमा सांगीतिक प्रस्तुति र वक्तृत्व कार्यक्रम पनि गरिएको थियो।
कुलमान घिसिङले आफ्नो कार्यकालमा नेपालमा लामो समयसम्म विद्यमान लोडसेडिङ अन्त्य गर्दै विद्युत् व्यवस्थापनमा आमूल सुधार ल्याएका थिए। उनको कार्यशैली र दूरदर्शिता नेपाली जनताले अत्यधिक सराहना गरेका छन्। यही कारणले उनको हटाइएपछिको निर्णयप्रति जनस्तरबाट असन्तुष्टि प्रकट हुँदै आएको छ।
संयुक्त आन्दोलन परिचालन समितिका संयोजकले भने, “हामी कुनै पार्टीको पक्षधर होइनौं, हामी जनताको पक्षमा छौं। कुलमान घिसिङ देशको सम्पत्ति हुन्, उनको अनुभव र इमानदारिताले फेरि पनि नेपाल उज्यालो बनाउन सक्छ।”
प्रदर्शन शान्तिपूर्ण रूपमा सम्पन्न भएको जनाइएको छ। आन्दोलनरत पक्षले अझ सशक्त आन्दोलनका कार्यक्रम घोषणा गर्ने चेतावनीसमेत दिएका छन् यदि सरकारले मागलाई वेवास्ता गर्यो भने।
