काठमाडाैं । महानगरपालिकाका मेयर बालेन्द्र शाहले देश नडुबाउन आग्रह गर्दै प्रधानमन्त्री केपी शर्मा ओलीलाई सामाजिक सञ्जालमार्फत आग्रह गरेपछि एमाले महासिचव शंकर पोखरेलले पनि समाजिक सञ्जाल बाटै जवाफ फर्काएका छन् ।
मेयर बालेनले शुक्रबार राति फेसबुकमार्फत प्रधानमन्त्री ओलीलाई पत्र लेख्दै देश नडुबाउन आग्रह गरेका थिए । ‘प्रधानमन्त्रीज्यू, भोको पेट मारेर मलाई हराउन खोज्नुभाको, हामी त तपाईंकै मदन भण्डारीको सपना पूरा गर्न हिँडेको मान्छे ! मलाई हराउने ताकमा, देशलाई चाहिँ नडुबाउनु होला’, बालेनले सामाजिक सञ्जालमा लेखेका छन् ।
मेयरले कुन प्रसंगमा प्रधानमन्त्रीलाई यस्तो आग्रह गरेका हुन् भन्ने विषय प्रस्ट पारेका भने छैनन् । तर बालेनको स्टाटसको जवाफ एमाले महासचिव शंकर पोखरेलले पनि सामाजिक सञ्जालबाटै दिएका छन् ।
उनले भनेका छन्, ‘काठमाडाैं महानगरको मेयर बालेनले सरकारले कार्यकारी अधिकृत नपठाएको आरोप लगाउँदै तिखो आक्रोश र असन्तुष्टि पोखेको देखिन्छ । तर किन पछिल्लो समय कार्यकारी अधिकृत त्यहाँ जान मानिरहेका छैनन् भन्ने कुरामा उनको ध्यान पुगेको देखिँदैन । कार्यकारी अधिकृत जान नमान्नुको कारण जे भए पनि सरकारले विशेष व्यवस्था गरेर भए पनि अविलम्व कार्यकारी अधिकृत पठाउनु पर्दछ । कार्यकारी अधिकृतको अभावमा महानगरको सेवा प्रवाह र अन्य काममा समेत असर पर्न सक्दछ ।’
