काठमाण्डौ / गएको आर्थिक वर्ष २०७९/८० मा झण्डै दुई करोड रुपैयाँ असुल उपर गरेको छ ।
सरकारका विभिन्न निकायको बेरुजु फर्स्याैट तथा सरकारी बाँकी रकम असुल उपर गर्ने जिम्मेवारी पाएको कुमारीचोक तथा केन्द्रीय तहसील कार्यालयले गएको आर्थिक वर्ष २०७९/८० मा झण्डै दुई करोड रुपैयाँ असुल उपर गरेको हो ।
सरकारका विभिन्न निकायको कारोवारमा २ अर्ब ५२ करोड रुपैयाँ साँवा र ब्याजसहित असुलउपर गर्नुपर्ने देखिएको छ ।
तर गएको आर्थिक वर्ष २०७९/८० मा कुमारीचोक तथा केन्द्रीय तहसील कार्यालयले एक करोड ९७ लाख रुपैयाँ असुल उपर गरेको छ । यद्यपि यो रकम गएका तीन आर्थिक वर्षको भन्दा धेरै नै हो ।
कुमारीचोक तथा केन्द्रीय तहसील कार्यालयकी कार्यालय प्रमुख नमूना कार्की दाहालले गएको आर्थिक वर्षमा ५ वटा तेजारथ बापतको सरकारी बाँकी असुल गरिएको बताउनु भयो ।
त्यस्तै घरेलु तर्फको २४ वटा लगत कट्टा गरेको र एउटा मात्रै सरकारी बाँकीसरह असुल उपर गर्नुपर्ने लगत कट्टा गरेको जानकारी दिनुभयो ।
उनले कतिपय असुलउपर गर्नुपर्ने व्यक्तिहरु अदालतमा जाने र अदालतबाट असुलउपर नगर्नु भन्ने अन्तरिम आदेश लिएर आउने भएकाले पनि लक्ष्य अनुरुपको असुल उपर गर्न नसकिएको बताए ।
२०१८ सालको महालेखाको प्रतिवेदनपछि २०५९/६० सम्मको सरकारी बेरुजुतर्फ भने १८ अर्ब भन्दा बढी थियो ।
अहिलेसम्म झन्डै ३ अर्ब रुपैयाँ असुल उपर र फर्स्याैट भइसकेको र अब १५ अर्ब १२ करोड १६ लाख ५० हजार रुपैयाँ अझै असुल उपर हुन बाँकी रहेको उनले बताए ।
