काठमाडौं : गुल्मीका एक वडा अध्यक्षले आत्महत्या गरेका छन् । जिल्लाको मुसिकोट नगरपालिका- १ का वडाअध्यक्ष मोहन घिमिरे मृत फेला परेका हुन् । उनले सामाजिक सञ्जाल फेसबुकमा स्टाटस लेखेर बेपत्ता घिमिरेको शव शनिबार बिहान घरबाट केही दूरीमा रहेको जंगलमा फेला परेको जनाइएको छ ।जिल्ला प्रहरी कार्यालय गुल्मीका अनुसार घिमिरे रुखमा झुण्डिएको अवस्थामा फेला परेका हुन्।
घिमिरे शनिबार बिहान ५ बजेतिर फेसबुकमा भावुक स्टाटस लेखेका थिए। उनले फेसबुकमा लेखेका छन्, ‘परिस्थितिको चपेटामा परे पछि बाच्नुको अर्थ हुँदो रहेनछ। प्रिय अनिता, साथ निभाउन सकिनँ। मलाई माफ गरे। घर परिवार, साथी-भाइ, सुभचिन्तक सबै सँग माफी चाहान्छु। अलबिदा। ” घटनाबारे थप अनुसन्धान भइरहेको जिल्ला प्रहरी कार्यालय गुल्मीले जनाएको छ ।
