सर्लाही निर्वाचन क्षेत्र नम्बर ४ बाट प्रतिनिधि सभा सदस्यमा निर्वाचित राष्ट्रिय स्वतन्त्र पार्टी (रास्वपा) का नेता अमरेशकुमार सिंहले पराजित प्रतिस्पर्धी गगन थापालाई एक खुलापत्र लेखेका छन्। सामाजिक सञ्जालमार्फत सार्वजनिक गरिएको उक्त पत्रमा सिंहले थापालाई भ्रष्टहरूको साथ छोडेर स्वच्छ राजनीति गर्न सुझाव दिएका छन्।
सिंहले गगन थापालाई कांग्रेस बदल्न खोजे पनि आफू बदलिन नसकेको टिप्पणी गर्दै चुनावका क्रममा आफ्नो निजी र पारिवारिक जीवनमाथि प्रहार गरिएको आरोप समेत लगाएका छन्। अब देश निर्माणमा रास्वपा अगाडि बढिसकेको र जनमतले भ्रष्टहरूलाई ठेगान लगाउने बताउँदै उनले आगामी दिनमा मुद्दाका आधारमा सहकार्य हुन सक्ने संकेत गरेका छन्।
