काठमाडौँ । ३० औं जनयुद्ध दिवसको अवसरमा नेपाल कम्युनिस्ट पार्टी (नेकपा) काठमाडौं जिल्ला समितिले आयोजना गरेको कार्यक्रममा पार्टी प्रवक्ता प्रकाण्डले “जनयुद्धको ऐतिहासिक महत्व र पार्टीको प्रतिबद्धताबारे विस्तृत धारणा राखेका छन् ।
जनयुद्धका उपलब्धिहरूलाई सम्झिँदै यसलाई जनताको हितमा अगाडि बढाउनुपर्ने धारणा व्यक्त गरे । साथै, उनले जनयुद्धका कार्यकर्ता र कार्यदिशालाई अझ सुदृढ बनाउन नेपाल कम्युनिस्ट पार्टी प्रतिबद्ध रहेको बताए ।
प्रकाण्डले जनयुद्धलाई “हाम्रो आस्था, विचार, र मुक्तिको प्रतीक” भनी परिभाषित गर्दै भने, “जनयुद्धले नेपालमा दमन, शोषण र उत्पीडनको विरुद्ध विद्रोहको अधिकार सुनिश्चित गर्यो। यो आन्दोलन माओवादी पार्टीको आत्मा र विचारको मुख्य आधारशिला हो।”
उनले शासकहरूले बन्दुकको शासन चलाएमा त्यसका विरुद्ध बन्दुक उठाउने अधिकार छ भनी जनतालाई विचार प्रवाह गर्ने जनयुद्ध र माओवादी पार्टीलाई अपराधीको संग्या दिनेहरूले जनताको त्याग र बलिदानलाई अपमानित गरिरहेको आरोप लगाए ।
कार्यक्रममा विभिन्न नेताहरूले जनयुद्धको योगदान र त्यसले ल्याएको राजनीतिक परिवर्तनलाई सम्मान गर्नुपर्ने धारणा राखेका थिए। उपस्थित कार्यकर्ताहरूले जनयुद्ध दिवसप्रति गर्व गर्दै एकता र संघर्षलाई निरन्तरता दिने संकल्प गरेका थिए।
उक्त कार्यक्रमलाई नेकपाका शीर्ष नेताहरू, कार्यकर्ता र शुभेच्छुकहरूको उल्लेख्य सहभागिता रहेको थियो।
