काठमाडौँ । कृषि विकास बैंक द्धारा सोज १० देखि १२ गतेसम्म देशभर भएको अविरल बर्षाका कारण क्षतिमा परेका पीडितहरुको राहतका लागि एक करोड ५० लाख रुपैयाँ सहयोग गरिएको छ ।
संस्थागत सामाजिक उत्तरदायित्व अन्तर्गत बैंकको तर्फबाट सञ्चालक समितिका अध्यक्ष रामशरण पुडासैनीले प्रधानमन्त्री केपी शर्मा ओलीलाई एक करोड ५० लाख रुपैयाँको चेक हस्तान्तरण गरेका हुन् ।
कृषि विकास बैंक लिमिटेडले बाढीबाट प्रभावित र पीडितलाई राहत पुग्ने गरी नेपाल सरकार लाई आर्थिक सहयोग गरेकोमा प्रधानमन्त्री ओलीले धन्यवाद ज्ञापन गरेका थिए । कृषि विकास बैंक लिमिटेडले आफ्नो संस्थागत सामाजिक उत्तरदायित्व कार्यक्रम अन्र्तगत विगतमा पनि भूकम्पबाट प्रभावित र कोरोना महामारीबाट पीडितहरुको लागि नेपाल सरकारबाट गठित उद्धार कोषमा रकम जम्मा गरेको थियो ।
उक्त कार्यक्रममा बैंक सञ्चालक समितिका सदस्य एवं नेपाल सरकार अर्थ मन्त्रालयका सह-सचिव दीर्घराज मैनाली, बैंकका प्रमुख कार्यकारी अधिकृत गोविन्द गुरुङ, उपमहाप्रबन्धक यज्ञप्रकाश न्यौपाने, विभागीय प्रमुख सरिता दाहाल र वरिष्ठ शाखा प्रमुख धुर्व पौडेल एवं प्रधानमन्त्री कार्यालयका सचिवालय सदस्यहरुको समेत उपस्थिति रहेको थियो ।
