काठमाडौं । भ्रष्टाचार र संगठित अपराधविरुद्धको अनुसन्धान प्रभावकारी नभएको भन्दै भद्रकालीमा विरोध प्रदर्शन भएको छ । शनिबार बृहत् नागरिक आन्दोलनले भ्रष्टाचार र संगठित अपराधविरुद्धको अनुसन्धान फितलो भएको भन्दै खबरदारी गरेको हो ।
ललितानिवास, नक्कली शरणार्थी र सुन तस्करी प्रकरण लगायतका भ्रष्टाचार प्रकरणमा अनुसन्धान प्रक्रिया फितलो भएको उनीहरुको निष्कर्ष छ । यी प्रकरणमा गरिएको रचयनात्मक अनुसन्धान र अभियोजनले सरकार नै भ्रष्टाचार र संगठित अपराधलाई प्रश्रय दिन उद्यत देखिएको आन्दोलनद्वारा जारी विज्ञप्तिमा जनाइएको छ ।
ललिता निवास प्रकरणमा मुछिएका पूर्वप्रधानमन्त्रीद्वय माधव नेपाल र डा बाबुराम भट्टराईलाई छानबिनको दायरामा ल्याउन, सर्वोच्च अदालतले दिएको आदेशको यान्त्रिक पालना गरेको देखाउन बयान लिने औपचारिकता पूरा गरेर उनीहरूलाई अभियोजन नगरी साक्षीका रूपमा उन्मुक्ति दिएको विज्ञप्तिमा उल्लेख छ ।
